Jeugdprins Jeroen d’n Urste

Miene naam is Jeroen Rutten. Ik bin gebaore op 20 april 2006 op de Papeling. Ik woen dao mit mien pap Patrick, mam Jolanda en mien zus Jenna. Ik waas enne hiele brave baby, ik deej allien ma slaope en aete en dao bin ik nag steeds good in! Ok haj ik al en bitje prinselik blood, want miene pap is jeugdprins gewes in 1984.

Vanaaf daat ik koos loepe deej ik mej mit de optocht vaan de JOL. Ok ging ik ieder jaor nao de optocht in Zaerum en Hooorrs kieke. Dao stond ik in Hors naeve de weg in mien cowboypekske mit neppistool en reechte op unne groete karnavalswaage. Paaf, dao sprong dae band vaan de wage kapot. Ik schrok meej kapot, keek nao mien gewaer en doog: WTF* (of in het Lottums; hoe ken daat
nou?).

Op mien 4e ging ik mit de fiets nao de Bottel. Ut fietse daat ging soms nog ni zo good en da loog ik in de heg te kieke. In groep 5 begoos ik aan mien voetbalcarriere beej SV Lottum. Ma daat bleek gen succes. Mit de Jako-dagen vond ik ut in de kantine gezelliger aas op ut veld achter de bal aan te renne. Dus nao un paar jaor bin ik der ma mej gekapt. Taegewaordig doj ik bokse en houw ik vort taege de bal.

Op de zaoterdig en in de vakanties waerk ik tusse de roeze en seringe beej Lakei um waat geld beej te verdeene. Zaoterdigaovend zit ik meistal mit de kammeruj in Houteze in de kiet. Nao de Bottel ging ik nao ut Dendron. Dao zit ik nou in ut letste jaor en haop ik mien diploma te haale. Daonao goj ik verder liere op ut Yuverta in Hors, de opleiding teelt en techniek en dao mej wil ik kwaliteitscontroleur waere. Ma daat is pas vur later.

Nou urs karnaval viere mit jeugdprinses Manja d’n Urste, ozze ceremoniemeister Jens, ozze raod en gans Lottum. Ik zuj zegge: Pegge en Peginne, Alaaf!

Jeugdprinses Manja d’n Urste

Miene naam is Manja Aarts. Ik bin gebaore op 20 april 2006. En jao, daat is precies dezelfde gebaortedatum aas jeugdprins Jeroen!!! Daat is wal hiel toevallig wah.

In Houteze zat ik mien urste stapjes, maa nao en aantal jaore bin ik verhoest nao os bruisende centrum vaan Lottum. En dao woen ik nog steeds kei gaer, saame mit mien mam Baukje en mien
zuske Nina.

In miene vreeje tied zoot ik vroeger natuurlik beej de JOL. Daat vond ik altied kei leuk, lekker spelkes doon en vuraal ut knutsele waas mien favoriete activiteit. Ik heb hiel waat kunstwaerke
gemaakt.

Mit d’n optocht op Gekke Maondig heb ik ok duk meij geloepe. En weej zien toen zelfs en paar kier in de prieze gevalle. Ok nog en paar kier meij gedaon aan de mini playbackshow. Dus straks jureere zal meej wal gaon lukke aas ervaringsdeskundige!

Ok heb ik nog en jurke judo geprobeert maa daat waas ut ni, daat ging wiets te lomp aallemaol vur meej. Beej mien urste wedstrijd kreeg ik genne baeker en toen waas ik d’r eigulik al geliek klaor
meij. Toen nog en paar jaor gekorfbald, maa taegewaordig vind ik fietse zonder foetelfiets door waer en wind nao Hooors sport genog. In de wiekende bouw ik gaer gooje fiesjes mit mien
kammeruj.

Waerke, urst ut Mededelingebledje rondbrenge aalich, op d’n Ulsheggerweg, toen beej de tomaate in Californië, en nou aan ut waerk beej ut Maashotel in Brokeze. Vurrig jaor geoefend op de
roezeplak en dit jaor nao de exames, vol gaas aan de geng dao. En daan haopelik slaage en nao Eindhoove, beginne aan de opleiding vur opticien. Maa nou urs duchtig saame mit miene prins Jeroen, ozze ceremoniemeister Jens Rutten, ozze raod, de groete Prins Giel en zien gevolg en de rest van gans Lottum duchtig karnaval viere!

Ik zuj zegge, pegge en pegginne, Alaaf!