Laevesloep Jeugdprins Guus
Pegge en Pegginne,
Guus is gebaore op 11 oktoeber 2009 in Lottum op unne zondigaovund tijdes ‘Boer zoekt vrouw’. Dus daat ie now Jeugdprins is, kump misschien wal umdaat ie en zondigskiendje is. Haen is de derde zoen vaan Arjan Klopman oet d’n Hegelsum en Anoeska Heinemans. Unne kalverboor en unne vie-arts: daan mot hin d’r zelluf toch en biestig gooje karnaval vaan kunne maake.
Guus haaj ut soms baes zwaor mit 2 aldere broors (Sven en Bas) die eum toch wal mekkelik op de kas kooste jaage, maa gelukkig kwaam dao nao 2,5 jaor ok en zuske Noor beej. En tja, die woord toen ut slachtoffer vaan Guus. Daat Noor mit ut oetkomme vur eum moos danse, dao is al onder ut aete ovver gesteggeld.
Toen Guus ongevaer 2 jaor ald waar kwaam ie mit zienne doem tusse en klepbank. Daat hed d’r vur gezurgd daat ziene doem d’n andere kant op wies aas beej andere minse. Dus mit Guus veurop in de polonaise kaan d’r wal es en andere kant op gegaon waere daan haen aanwies. Toen haen 3 jaor ald waar haaj haen saame mit zien breurs botte gevonde in d’n tuin/reejbak. Dinobotten! Drie waeke lang hebbe ze vaan smirges vroeg wies sovvus laat gegraave. Toen haaje ze d’n hond vaan opa en oma in enne emmer beej-ien. Dino’s waare vroeger zoewiezoe en bijzonder punt. Want mit unne roestige spijker kunde op de moi gladgestucte moor in de hoeskamer ok dino’s teikene…
En toen haen d’rachter kwaam daat d’r mier waar aas dino’s, stond zien ganse kamer vol mit opgezatte bieste. Zelfs Sinterklaos haaj dees meij in ziene stoemboet. Taegewaordig hange ze neet mer op zien kamer, maa vurrig jaor haet ie mit stage beej de preperateur Bouten in Venlo nag wal bieste meij meuge opzette. Mit aas eindwaerk gans zelluf unne kop van un kat meuge opzette (nae, de kat kwaam neet oet Lottum).
Op zien 5e begoos Guus mit judo, daat ging um redelik aaf, dus vaan Lottum ging ie ok judoen in Venroj, maa nao en paar jaor vond ie daat toch minder leuk, dus sinds en paar jaor bokst ie 2x per waek in Horsss.
Schoel is saai, dao waas haen al vaanaaf de basisschoel hiel duudelik in. Vaan juf Meggie kreeg ie ut verbod um ut waord ‘saai’ te zegge. En op 1 april deej haen jaorliks net aas zien breurs standaard zalt in de koffie vaan de juf.
In de brugklas begoos haen op HAVO/VWO, maa ok daat waar saai en ut hoeswaerk nag saaier… Oftewal daat maakt ie tot op d’n daag vaan vandaag nog steeds ni. Dit in combinatie mit de ervaringe vaan de lieraare mit zien breurs, haet d’r toe geleid daat ut VMBO-T is gewaore. Maa gelukkig is ut dit jaor eindexamejaor… En daan volgend jaor op de VEVA. Oftwel veurloeper vaan defensie, umdaat ie daan nag 2 jaor kaan bedinke waat ie echt wil waere…
In de coronatied woord Guus saame mit Eva schoelprins, daat waas geweldig. Maa helaas haet haen d’r niks aan gehad; genne optocht, genne karnaval. Dus toen haaj haen al beslaote en gehopt daat ie jeugdprins woj waere. Mit ut jubileumwiekend haet ie al de muts vaan Jeroen meuge passe en daat beveel eum wal… En now dus vur ut echt. En jao, thoes woord vanaaf karnaval mam duk verwenst mit eure vastelaovusmuziek. Maa toen haen vur het echt karnaval koos viere veel eum wal op daat ie aalles meij koos zinge! Dus kom maa op: Guus en Aniek gaon veurop!
Jeugdprins Guus d’n Urste
Laevesloep Jeugdprinses Aniek
Pegge en Pegginne,
Aniek is gebaore op 14 fibberwari 2009 in ut zeekehoes in de stad. De bevalling woj ni zo vlotte, dus woord d’r maar un ritske gemaakt in de boek en zoe kwaam Aniek op zaoterdig um 10 vur 1 op de waereld. Aniek is un dochter vaan Theo Hoogveld oet Grubbevors en Mieke Coenders oet Houteze. Met un aldere broor Chris en zus Tess waas de femilie compleet. Ze is hiel bliej dat ze un megje is gewaore, anders haaj ze Alex geheite.
Aniek is beej zoe wal de femilie Coenders aas de femilie Hoogveld de jongste en dus de Benjamin vaan de femilie. Ut waas un schattig klein ding, en ze hofde maa te kikke en d’r waas wal aaltied eemus in de familie daen vur d’r ging renne. Tot ien jaor deej ze nag gen inkele poging um te kroepe of te tijgere of um te gaon staon. Daat waas ok ni neudig want d’r waas toch wal eemus daen eur deej draage. Maa toen ze mit anderhalf jaor ienmaal koos loepe, ging ze ok maa geliek renne. Aniek is un echt megje. Toen ze anderhalf jaor alt waas haaj oma vur Tess un gans roze prinsessejurk gemaakt. Drek toen ze um zoog zei ze taege oma: ikke ok! Dus kroop oma ma wer achter ut neijmesjien. Mit die klier en un hoep andere klier haet ze vul dansjes en shows vur pap en mam gegaeve.
Vaanaaf eur 3e deut ze al meij aan de kienderoptoch. Aas onder andere muzikant van de joekskapel, aas bleumke vaan de floriade en mit ut fietsvaer. Daomeij woord mennige pries in de wach geslept. Die baekers zien nag steeds te bewondere op Houthezerwaeg 6.
Umdaat schminke en verkleije hielemaol d’r ding waas, vond ze de playback show fantastisch! Mit de heksjes ginge ze d’r mit de aanmoedigingspries vaandoor. En de twie jaor daonao mit de hoefdpries. Aaltied mit en tof dansje en geschminkte snoet.
Vanaaf de 7 ging ze mit Eva danse en korfballe. Nao anderhalf jaor balletles en te hebbe gedanst in un smurfepak kwaam ze d’r achter daat de talente toch mier beej korfbal looge. Ze haet daan mit en aantal dames van de raod minnig kampioenschap behaalt. En nag steeds stut ze mit plezeer daat belke door ut mandje te mikke.
De leggere schoel ging aas vaanzelf. De juffe en meister zeije twie kier per jaor hoe good ze ut deej en daat ze wal un ganse klas vol Aniekjes woojje. Ze ging daan ok mit en havo-vwo advies nao de brugklas. En nao de brugklas meude ze nao ut atheneum maa dao doog ze zelf toch wal un bitje anders aover. Ze haaj inmiddels wal ontdekt dat schoel wal oke waas, maa ze haaj wal door dat d’r nevve schoel ok nag zaat andere leuke dinge te doon zien. Dus havo waas ech wal genog.
Um vul leuke dinge te doon mot d’r wal gaeld verdint waere, daorum daat ze urst maa beej opa en oma ging poetse. In de praktijk kwaam dat d’r op neer dat ze de haelft vaan de tied deej poetse en de andere haelft wieze lesse vaan oma kreeg. Toen daat allien ni genog opleverde, ging ze nag beej de Etos in Haors en beej oeme Frank waerke.
Daat ze now Jeugdprinses meug zien is un cadeautje. Aal daat verkleije, zinge en danse zal daobeej good vaan pas komme. Laot gaon mit die banaan, Guus, Aniek en Suus gaon d’r tegge aan!
Jeugdprinses Aniek d’n Urste